Trop Mad : le restaurant Le Jardin Gourmand et la cuisine de Nathalie Beauvais.

Miñsadenn kregin Sant Jakez hiliet get regalis hag he skañvadell per-douar

Pierre — 2012-11-20T16:07:10Z


aoziñ		1 e
yenerez		1 e

live		****
koust		€ € € €

Evit 8 den :

4 kg kregin Sant-Jakez pe 500g kraoñ kregin Sant-Jakez

An hilienn :
1 loaiad-soubenn gwinegr sistr
3 loaiad-soubenn eoul oliv
1 loaiad-soubenn eoul kraoñ-kelvez
holen, pebr
1 meudad brav a regalis (poultr)

Ar saladenn per-douar
600 g per-douar
holen bras, holen munut, pebr
1 loaiad-soubenn gwinegr sistr
1 loaiad-soubenn eoul kraoñ-kelvez
2 loaiad-soubenn eoul oliv

Ar skañvadell per-douar :
600 g per-douar
holen bras, holen munut, pebr
75 cl dien fresk
3 follenn kaotenn
2 wenn-vi
1 loaiad-kafe gwinegr bazalmek

Aoziñ ar legumaj : dibluskiñ ar per-douar, o gwalc'hiñ get dour hag o foazhiñ en dour evel avaloù-douar : krogiñ get dour yen ha sall ha leuskel da c'houvirviñ etre 20 ha 30 mun. O dizouriñ mat e fin ar poazhadur hag o ranniñ e daou, en hevelep doare (un hanter evit ar skañvadell hag egile evit ar saladenn).
Aoziñ ar skañvadell : lakaat ar follennoù kaotenn da soubiñ e dour yen. Mesketa ar per-douar get an holen, ar pebr hag ar gwinegr bazalmek. Adsasuniñ mar bez ret. Oc'hpenniñ ar follenn kaotenn, dizouret-mat, hag advesketa pep tra un tammig. Mirout. Basat an dienn fresk get an holen hag ar pebr betek ma tay 'el chantilly. Hec'h oc'hpenniñ neuze d'ar flastrenn per-douar, en ur veskiñ dousik get ur spanell. Mirout ar skañvadell, en ur lec'h fresk, e-pad un eur d'an nebeutañ, a-raok he debriñ.
Aoziñ ar saladen per-douar : e-barzh ur plad-saladenn skuilhiñ ar gwinegr, an holen hag ar pebr. Oc'hpenniñ an eoulioù, tamm-ha-tamm, en ur vezkiñ get ur baser. Troc'hiñ ar per-douar e stumm diñsoù bihan hag o oc'hpenniñ d'ar chaous-gwinegr. Adsasuniñ mar bez ret ha mirout ar saladenn en ur lec'h klouar.
Aoziñ ar c'hregin Sant-Jakez : digloriñ ar c'hregin, gwalc'hiñ ar c'hraoñ hag o sec'hiñ mat. O miñsat get ur gontell vihan lemm-mat, ar tanavañ ar gwellañ. Aoziñ an hilienn é veskiñ ar gwinegr-sistr, an daou eoul, an holen hag ar pebr.
Staliiñ : Àr bep asied, staliiñ en o c'hreiz ur loaiad saladenn per-douar hag he goloiñ get ur vrav a loaiad skañvadell per-douar. Pallenniñ ar peurrest ag an asied get ur strilhenn hilienn. Ranniñ ar chantellennoùigoù kraoñ kregin Sant-Jakez hag o lediñ àr an hilienn. Holeniñ, pebriñ ha strewiñ ur meudad brav a regalis àr bep tamm kraoñ Sant-Jakez. Pallenniñ, evit echuiñ, ar c'hraoñ Sant-Jakez get peurrest an hilienn. Faota ‘ket chom hep krediñ implijout e vizied evit lediñ an hilienn. Debriñ doc'htu.

Menozioù Nathalie :

Gallout a rit servijout an deroù-pred-mañ get bara mat krazet. Ma n'eus tamm poultr regalis ebet genoc'h e c'hellit lakaat poultr kraoñ-kelvez e plas. Disheñvel-mik eo ar blaz met ar meskaj « per-douar, kraoñ-kelvez, kraoñ sant Jakez » a zo plijus-kenañ ivez… n'eo ket ken divoutin avat. A viz Here betek miz Ebrel eo koulz-blez ar c'hregin Sant-Jakez.

Pufoùigoù dienn chantilly blaz ar roz get avaloù

Pierre — 2012-11-20T15:21:24Z


aoziñ		45 mun
poazhiñ		30 mun

live		****
coût		€ € € €

Evit 8 den :

Toaz ar pufoù :
25 cl dour
140 g bleud
110 g amann hag 20 g evit amannenniñ plakenn ar forn
4 vi + 1 melen-vi
1 loaiad-soubenn dour

Dienn chantilly :
500 g dienn dourennek dre zienn
150 g sukr
1 loaiad-soubenn dour-roz (en apotikerioù pe er stalioù biologel)

Yod avaloù :
750 g avaloù
100 g sukr
20 cl dour

Kinkliñ :
1 aval
Sukr-erc'h
petalennoù roz fresk pe sec'h

Aoziñ toaz ar pufoùigoù : aoziñ toaz ar pufoùigoù Lakaat an dour, an amann troc'het e tammoù bihan, ur meudad holen hag unan a sukr e-barzh ur gastelodenn ledan. Lakaat kement tra da virviñ hag entoueziiñ ar bleud doc'htu. Sec'hiñ an toaz àr un tan etre en ur verat anezhoñ get ur spanell, ha get nerzh. Pa zistag an toaz a-zoc'h foñs ar gastelodenn he lakaat e-barzh ur plad-saladenn. Oc'hpenniñ ar vioù unan-hag-unan en ur veskiñ kreñv get ar spanell (gallout a ra ar labour-mañ bout graet get ur robod-kegin !).

Raktommiñ ar forn da 200°C (tt 7). Amannenniñ ur blakenn-forn (pe 2 pe 3 hrevez ment ar forn) ha lakaat loaiadoù-kafe brav a doaz, e stumm melloù bihan get plas kenetrezo peogwir emañ an toaz é vonet da c'hweziñ (36 puf a zelehec'h kaout). Meskiñ ar melen-vi get ur loaiad-soubenn laezh. Lopetat pep pufig get ur fourchetez soubet er meskaj melen-vi ha laezh. Lakaat ar pufoùigoù da boazhiñ er forn tomm (200° tt 7) e-pad 15 mun hag izelaat àr-lerc'h da 170° (tt 5-6) ken na vint sec'het mat (15 mun). Tenniñ ar pufoùigoù ag ar forn, o dibegiñ ag ar blakenn get ur spanell hag o gouarniñ e temperadur ar pezh.
Aoziñ ar flastrenn : dibluskiñ, displusiñ ha miñsat an avaloù en un doare gros an avaloù. O skuilhiñ en ur gaoter get ar sukr hag an dour. Poazhiñ razh àr an tan etre, get ur golo, betek ma vo teuz-holl an avaloù. Ne faota ket kaout aon da vasat ar flastrenn evit ma vo-hi lintroc'h. Leuskel da yenaat.
Aoziñ an dienn chantilly : e-barzh ur plad-saladenn yen-mat, skuilhiñ an dienn dourennek yen get ar sukr ha get an dour-roz. Basat razh betek ma teuio da vout èl ur chantilly.
Staliiñ : ranniñ pep pufig etre daou get ur gontell-vara. Lakaat ur loaiad-kafe flastrenn hag àr-lerc'h ur loaiad-kafe dienn chantilly e foñs pep hani. Goloiñ razh get tok ar pufig. Lakaat brav ar pufoùigoù-mañ àr ur plad-gwastelloù brav. O foutrenniñ get sukr-erc'h ha petalennoù-roz ha kinkliñ get ruilhennoù aval fin-tout.

Menozioù Nathalie : an dour-roz a zo kalz frond getoñ, implijit eñ get evezh ! Monet a ra mat-kaer get pech skaotet e siros. Ma n'oc'h ket awenet get an dour-roz e c'hellit lakaat un tamm kanell e plas… un tammig britishoc'h !

Gwin Arnaud : ur gwin crémant pe un hentenn hengounel a yelo mat-tre get skañvted ha soutilded an dibenn-pred-mañ met gwelloc'h c'hoazh, din-me, e vo ur banne te glas « sencha » a vro Japan pe ur banne te jasmin hag a gaso deoc'h ar c'hempouez evit koazhiñ, ken plijus e fin ur pred.

‘Ruilhadoù an nevez-amzer' get skañvadell brouskaol ha kig kevnid-mor

Pierre — 2012-11-20T14:46:10Z


aoziñ.		60 min
poazhiñ		25 min

live		****
koust		€ € € €

Evit 6 den :

1 kg brouskaol
½ sitroñsenn
10 delienn stragon
10 cl eoul oliv
5 cl eoul kraoñ-kelvez
holen, pebr
1 letuzenn
1 gevnidenn-vor vrav (tro 1,5 kg)

Poazhiñ ar gevnidenn-vor ha digloriñ : lakaat ur gastelodennad dour sall-mat da virviñ. Splujiñ ar gevnidenn-vor en dour berv ha leuskel pep tra da virviñ adarre. Bihanaat an tan ha leuskel da c'houvirviñ dousik e-pad 20 munutenn (10 mun m'eo ‘bihan-tout' ar gevnidenn-vor ha betek 35 mun ma tenn d'un euzhvil-mor !). Dizouriñ ar gevnidenn-vor hag he lakaat e-barzh ur plad. He leuskel da yenaat un tammig. He digloriñ, skarzhiñ ar c'hlor ha mirout ar c'hig er yenerez.
Poazhiñ ar brouskaol : lakaat ur gastelodennad dour sall da virviñ. Dilostiñ un tammig ar brouskaol evit, dre vras, mirout ar penn anezhe hepken. O gwalc'hiñ hag o splujiñ en dour berv. O leuskel da boazhiñ àr an tan bras ha goloet betek ma tay ar brouskaol da vout tener (etre 5 ha 10 mun). O zenniñ ag an dour hag o splujiñ en dour yen-yen a-benn o yenaat buan hag evit ma chomehent glas-mat. O dizouriñ. O frikiñ e-barzh ur robod get holen, pebr, stragon, chug an hanter sitroñsenn hag an eoulioù. Adlakaat pebr hag holen mar bez ret. Lakaat en ur plad-saladenn ha mirout en ur lec'h fresk.
Aoziñ ar letuzenn : dizeiliñ, gwalc'hiñ ha dizouriñ mat ar saladenn. Mirout en ur lec'h fresk.
Staliiñ : lakaat en un delienn letuzenn ur loaiad-soubenn rez a skañvadell brouskaol, ar memes loaiad a kig kevnid-mor hag ober ruilhennoù brav (implijout skarzhoù-dent evit o mirout serr-mat). Debriñ get an daouarn ma vez ur pik-nik pe get fourchetenn ha kontell ma vezit doc'h taol !

Menozioù Nathalie :

En nevez-hañv emaomp e kreizig-kreiz koulz ar c'hevnid-mor ha domaj e vehe chom hep profitiñ ! Neuze setu un nebeud menozioù ker simpl ha tra !

Saladen asperjez, letuz ha kig kevnid-mor get orañj : N'ho po nemet meskiñ an asperjez get ar letuzenn hag an tammoù orañj, sasuniñ get un tammig ag ar chug-orañj hag an eoul oliv ha lakaat e-barzh ur plad-saladen ha strewiñ razh get kig kevnid-mor… trop mad eo !

Soubenn kalav irvin-ruz get tammoù kig kevnid-mor : En nevez-hañv emañ ivez kreizig-kreiz koulz an irvin-ruz. Neuze implijit ar c'halav (delioù glas an irvin-ruz) evit ober soubenn (ar memes hini hag soubenn-linad p.38 er levr « trop Mad ») ha servijout ar soubenn tomm-mat get kig kevnid-mor hag un nebeud ruilhennoù irvin-ruz evit kinkliñ.

Koñkombrez farset get irvin-ruz ha kig kevnid-mor : dibluskiñ ar c'hoñkombrez en ur denniñ ar plusk ur wezh àr ziv hag troc'hit inte daou en tu an hirañ. Toullit int ha skarzhit ar splus. Holenit ha mirit int en ur lec'h fresk. E-keit se meskit kig ar c'hevnid-mor get chaous maionez (Hama ! A-benn ar fin, ar c'hevnid-mor get maionez ken hengounel) get ruilhennoù irvin-ruz miñset munut. Emañ o vont da reiñ muioc'h a vlaz d'ar farz. Gellout a rit ivez lakaat un tammig kraksivolez troc'het fin ma vez genoc'h. Farsit an hanter-koñkombrez get an aozadenn-mañ ha troc'hit int e troc'hadoù bihan. Debrit int evit an digor-kalon pe evit an deroù-pred.

Opala ! darbet eo bet din disoñjal : ar rekipe hengounel a Vreizh : Gallout a rit oc'hpenniñ al lodennoù diennek hag ar c'houral, perisilh hag ur chalotezenn miñset munut d'ur chaous maionez get sezo. Pep kouviad a ziklor e gevnidenn-vor hag a dañva ar c'hig soubet er chaous.

Gwin Arnaud :

Evit lidiñ an nevez-hañv hag evit mont a-zoare get freskted ar c'hevnid-mor hag ar skañvadell brouskaol e c'hellit reiñ ur plas brav da frouezhted ha da freskted ur Muskadig diàr e vamm get e vlaz hep e bar.

Ma yit da biknikiñ en enezenn ar C'hened profitit eus ur gwin gwenn sec'h a Gorsika hag a zo iodek ha bliv e blant-gwini Vermentino (gallout a rin e dañva e Breizh zoken !)

Mae – Koñfitur kourjet get bazilik hag he fourmaj-gavr

Pierre — 2012-11-20T13:59:42Z

Evit 8 pod konfitur bihan :

2 kg kourjetez
500 g avaloù
1 tamm suraval
1,5 kg sukr munut
1 voutellad bazilik

Tenniñ plusk ar c'hourjet a bep eil, gwalc'hiñ ar c'hourjet hag o zroc'hiñ e stumm ruilhennoù tanav. Dibluskiñ ha displusiñ an avaloù. O zroc'hiñ e ruilhennoù tanav.
Meskiñ e-barzh ur plad-saladenn bras ar c'hourjet, an avaloù, ar sukr hag ar chug-suraval. Goloiñ razh ha leuskel ar meskad da hiliiñ e-pad un noz en ur lec'h klouar pe fresk.
Antronoz, skuilhiñ ar c'hourjet hag an aozennoù arall e-barzh ur gastelodenn ha lezel da boazhiñ dousik, get ur golo. Pa grog ar meskad da virviñ kendelc'her da boazhiñ hep ar golo, atav àr an tan bihan. Lezel da boazhiñ èl-se betek ma tay da vout e-giz ur siros (tro 30 munutenn). Ne vez ket distummet nag ar frouezh, nag ar legumaj, normal eo. Mesketat ar c'hoñfitur neuze.
Lakaat e pep pod, prop ha naet, unan pe div zelienn bazilik. Skuilhiñ ar c'hoñfitur kourjet berv e pep pod. O serriñ hag o lakaat war o zu-gin, ar golo en traoñ. Leuskel ar c'hoñfitur da oueledenniñ betek ma vo yenaet penn-da-benn.
Debriñ ar c'hoñfitur-mañ get ur fourmaj-gavr pe fourmaj gwenn.

Menozioù Nathalie :

Miz Mae eo kentañ miz ar blead e-lec'h m'emañ ar c'hourjetez é tonet (emaon o komz ag ar c'hourjetez, gounidet en ur zoujiñ doc'h reolennoù an natur, hag a zo chomet hep treuziñ ar bed a-raok degouezhout en ho plad !). Partiet eo evit 6 miz ha gwelloc'h eo kaout un nebeud menozioù evit keginiñ evit chom hep skuizhiñ re an dud par pe kar get ar brav a legumaj-mañ, blazet-mat, mat evit ar yec'hed, marc'had-mat hag aes da geginiñ.

Ma produit muioc'h a gourjetez evit ar pezh a zebrit ha m'ho peus c'hoant da vezañ hep ho par e kinnigan deoc'h ur menoz evit, àr un dro, keginiñ ha mirout an teñzor a legumaj-mañ !

Kirinad lostoù ejen get sistr, karot nevez hag ognon nevez

Pierre — 2012-11-20T13:24:09Z

Recette extraite de

aoziñ		45 min
poazhiñ		4 e

live		****
koust		€ € € €

Evit ur girinad etre 20 da 22 cm a hirder :

1 lost ejen
6 karotenn nevez vrav
1 voutellad ognon nevez
2 ognon
1 bourenn
1 skourr ach
1 boked louzoù-kegin (tim, lorev, lostoù perisilh)
2 voutailhad sistr
holen, pebr

Rakaoziñ : troc'hiñ al lost ejen e 4 zamm get ur gontell vras (doare kontell-viñsat) evit gellout e lakaat e-barzh ar gaoter. Riñsat mat an tammoù. Mirout. Dibluskiñ ha gwalc'hiñ ar c'harot, an ognon, an ognon nevez, ar bourenn hag ar skourr ach. Lakaat a-gostez 4 c'harotenn vrav hag an ognon nevez ha miñsat gros ar peurrest ag ar legumaj arall.
Poazhiñ ar lost ejen hag ar legumaj : e-barzh ur gaoter, lakaat an tammoù lost, ar legumaj miñset, ar boked louzoù-kegin, an holen, ar pebr ha glebiiñ razh get ar sistr. Klokaat ar glebiabur get dour ma n'eo ket bet goloet ar lost penn-da-benn get ar sistr. Lakaat razh da boazhiñ àr an tan bras betek ma virvay ar meskad. Leuskel da boazhiñ, get birvilh skañv, e-pad 2 eur get ur golo. Oc'hpenniñ neuze ar c'harot ha leuskel da boazhiñ 30 mun. Dihaniñ da boazhiñ neuze.
Sevel ar girinad : (emañ ret hen ober pa vez tomm) Lakaat ar lost e-barzh ur plad don hag an ognon nevez hag ar c'harot en o fezh e-barzh un asied. Silat chug ar poazhadur ha taoliñ legumaj ar gwarnisadur blazus er boubelenn. Tenniñ àr an tomm kig ar lost ejen. Rankout a ra dispegiñ a-zoc'h an askorn ha pilhoustenniñ un tammig. Mirout ar c'hig ha skarzhiñ an eskern. Lakaat ur film àr speurennoù diabarzh ar girin evit ma vo aesoc'h he divouliñ. Lakaat an hanter eus ar lostoù ejen e foñs ar girin. Pallenniñ get chug. Lakaat ar c'harot hag an ognon nevez àr un eil gwiskad. Pallenniñ ar chug. Echuiñ get ar lostoù ejen àr un trede gwiskad ha pallenniñ ar chug. Lakaat ar girinad e-barzh ur plad don ha he gwaskiñ un tammig get an daouarn evit skarzhiñ ar chug a zo e re. Lakaat ur film àr ar girinad ha he leuskel er yenerez betek ma vo yen penn-da-benn (tro 3 euriad).
Staliiñ : divouliñ ar girinad. Tenniñ ar paper film ha troc'hiñ ar girinad e chantelennoù 1 cm.

Menozioù Nathalie : daoust hag emaomp en hañv evit gwir ? Ma rankomp fiziañ e meteo miz Even he deus an anduilhenn get he flastrenn avaloù-douar kement a blas hag ur saladen tomat get bazilik. Hiriv e kinnigan deoc'h ur meuz hanter-hañv, hanter-goañv. Ur girinad kentoc'h magus met fresk ivez dre m'eo yen ha gant he legumaj ag an hañv. Kalon d'ho poued. Gallout a rit debriñ ar girinad get ur chaous tomat yen, un dienn baset get louzoù ha perak ne vehe ket un dienn baset ha spiset get un tammig wasabi (sasun japanad pebret-mat).

Gwin Arnaud : ur gwin ruz skañv ag ar gouennad gamay pe pinot du a yelo mat-kaer gant soutilded ar girinad-mañ. Ur gwin ag ar beaujolais, ur brouilly pe ur fleurie da skouer a vo ag ar choaz, evel ur gwin pinot du ag Elzas, get e notennoù un tammig pebret hag e vlaz skilgerez. Koulskoude e c'hellomp chom er vro ha diwall m'emaoc'h e soñj bleniiñ. Neuze e yay ar sistr « Royal Guillevic » a-feson get e soutilded, e frouezhted hag e notennoù trenkik freskaüs.

Soubenn pechez-prun get Crémant ag ar Liger hag he miñsadenn sivi

Pierre — 2012-11-20T13:04:37Z

Recette extraite de

aoziñ		40 min
poazhiñ		30 min

live		****
koust		€ € € €

Evit 6 den :

1 kg pech-prun (azv ha kuit a louzoù mard eo posupl)
125 g sukr
12,5 cl dour
20 cl crémant ag ar Liger
1 vazhig kanell
1 tach-jenofl
1 sitroñs
5 cl likor-pech
1 voutellad bent
500 g sivi
sukr erc'h

Alejiñ ar soubenn : gwaskañ ar sitroñs ha gouarniñ ar chug anezhoñ. Gwalc'hiñ ar pech-prun, o zroc'hiñ e stumm diñsoù bras (hep o dibluskiñ) ha skarzhiñ an eskern-pech-prun. E-barzh ur gaoter vras, skuilhiñ an dour, ar sukr, ar c'hremant, ar ganell, an tach-jenofl, chug ar sitroñsenn hag ar pech prun troc'het a-dammoù. Lakaat da boazhiñ get ur golo betek ma virvay ha lezel da boazhiñ, get birvilh skañv, hanter-c'holoet betek ma vo teuz ar pech prun (tro 20 munutenn). Tenniñ ag an tan. Skuilhiñ ar soubenn a-barzh ur bezel d'ober yod enni ha tenniñ ar vazhig kanell hag an tach-jenofl. Mesketat ar soubenn get ur mesketer-spluj-tredan. Oc'hpenniñ an dienn-pech hag ur skourrig bent (o soñjal en doare d'e lemel digudenn ag ar soubenn). Leuskel ar bent da c'hlec'hiiñ e-pad 10 mun hag he skarzhiñ àr-lerc'h. Mirout en ul lec'h fresk.
Aoziñ ar sivi : gwalc'hiñ, dizouriñ, didokiñ ha miñsat pep sivienn e div pe deir chantelenn.
Kinkliñ : ranniñ ar soubenn e-barzh koupennoù. Strewiñ ar sivi àr ar soubenn ha poultrenniñ razh get sukr-erc'h. Kinkliñ get delioù bent brav. Da zebriñ yen-mat.

Menozioù Nathalie : tu a zo eskemm ar pech prun get pech pe get nektarin. Koulskoude e kinnigan deoc'h dibluskiñ ar pech, e kemm get ar pech prun hag an nektarin, peogwir e vez alies un tammig tev plusk ar pech. Deoc'h da welet e-keñver ar frouezh a zo ganeoc'h ! Tu ‘zo eskemm ar sivi get flambouez, mat-tre eo ivez ! Hag erfin, m'ho peus c'hoant da lakaat ur maen gwenn pe d'ober cheuroc'h e kinnigan deoc'h lakaat champagne e-plas ar c'hremant… Trop Mad eo !

Gwin Arnaud : ur gwin bervus a zegaso ar c'hempouez get e soutilded, e frouezhded hag e glogor freskaüs… ur c'hremant ag al Liger, ar memes hini hag a zo bet distoufet genoc'h evit aoziñ ho tibenn-pred, eo evel-just an dimeziñ Trop Mad !!! Evit ar re lichous, ur gwin pech pe ur gwin-dous …eus ar Liger, evel-just ! ….hag evit ar re bitaod, e vo… « Champagne evit razh an dud !!! »

Dienn koko-Pempoull get bazilik ha grilhed-traezh

Pierre — 2012-11-20T12:49:13Z

Recette extraite de

aoziñ		1 h
poazhiñ		40 min

live		****
koust		€ € € €

Evit 6 den :

1 kg koko-Pempoull
1 kg tomat
20 cl eoul oliv
1 garotenn
1 penn-ognon
1 tach-jenofl
1 boked louzoù-kegin (lostoù perisilh, glas ar pour, tim, lorev)
1,5 kg grilhed-traezh
1 voutellad bazilik
Holen, pebr

Poazhiñ ar c'hoko : digloriñ ha gwalc'hiñ ar c'hoko. Dibluskiñ, gwalc'hiñ ha miñsat ar garotenn hag ar penn-ognon. Lakaat, e-barzh ur gastelodenn, ar c'hoko, ar garotenn, an ognon, an tach-jenofl hag ar boked louzoù-kegin. Glebiiñ kement tra'zo get dour yen betek ur live dereat (ur cm dour a zo a-us ar legumaj). Lakaat da boazhiñ àr an tan bras, get ur golo, betek ma virvay. Leuskel ar gastolodennad da virvilhiñ, goloet berped, ha gant birvilh bihan betek ma teuzo ar c'hoko (tro 30 mun). Lakaat holen ha mirout tomm.
Poazhiñ ar grilhed-traezh : lakaat, e-barzh ur gastelodenn vras a zour berv sall-mat, un dornad brav a c'hrilhed-traezh hag o zenniñ ag an dour kerkent ha ma adkrog an dour da virviñ stank. O foazhiñ e-mod-se e meur a wezh a-benn kaout grilhed-traezh blot met brav da welet. Digloriñ ar grilhed-traezh ha mirout o c'horf evit an dienn. Mirout ar pennoù evit ur rekipe all (da skouer, ur soubenn grilhed-traezh).
Aoziñ an dienn : tenniñ troadenn an tomat hag o askiñ un tammig war tu kontrel an droadenn get beg ur gontell vihan. Lakaat ur gastelodennad dour da birviñ ha splujiñ an tomat enni e-pad 20 eilenn. O zenniñ ag an dour ha tenniñ ar plusk diouzhtu. Troc'hiñ an tomat e pevar ha skarzhiñ ar splus. Mirout ar peurrest. Skuilhiñ, e-barzh ur mesketer-tredan, ar c'hoko dizouret (met mirout dour ar poazhadur), bouedenn an tomatez, 15 cl eoul oliv, an holen hag ar pebr. Mesketat pep tra hag ouzhpenniñ dour poazhadur ar c'hoko betek ma vo diennek-mat an hollad. Adlakaat holen ha pebr mar bez afer ha tremen ar meskad e-barzh ur sil sinat (pe ur sil) evit lemel plusk ar c'hoko. Leuskel da yenaat ur prantad mat.
Kinkliñ : dizeliñ ar bazilik hag e ziskolpiñ. Ranniñ an dienn a-barzh bolennoù. Lakaat ur lodenn ar grilhed-traezh hag ar bazilik e pep bolenn ha skuilhiñ ur strilh eoul oliv àr bep dienn dres a-raok tañva. Kalon d'ho poued !

Menozioù Nathalie : tu a zo eskemm ar grilhed-traezh get un tamm morzhed-moc'h mat-kaer, troc'het e stumm neudennoù tanav. Etre fin miz Gouhere ha penn kentañ miz Here emañ mare ar c'hoko. Neuze profitit evit o debriñ… Trop Mad eo !

Gwin Arnaud : trawalc'h eo gant dousted an dienn koko-mañ. Koulskoude, ma vez diouzh peurrest ho pred… peotramant perak pas evit an digor-kalon, kontrel, ar gwinoù gwenn ha gris ‘damsec'h' a gloto a-feson gant an deroù-pred freskaüs-mañ. Da skouer e soñjan er Vouvray, er Montlouis a vez disoñjet re alies evel ar C'habernets d'Anjou plijus-kaer e-pad an hañv… pa vez heol… Hama !!!

Risotto kig-boultouz get kraoñ-kelvez ha pour

Pierre — 2012-11-20T12:27:32Z


aoziñ		45 mun


live		****
koust		€ € € €

Evit 6 den :

1,5 kg kig-boultouz
200 g riz ront gwenn (doare Arborio)
600 g pour
8 cl gwin gwenn (doare muskadig)
85 cl dour (tro)
10 cl eoul oliv
10 cl dienn fresk
Holen, pebr
½ boutellad kraksivolez
20 kraoñ-kelvez fresk
5 cl eoul kraoñ-kelvez
50 g amann

Poazhiñ ar boultouz : raktommiñ ar forn da 250°C (tt 9, forn tomm-gor). Skarzhiñ kroc'hen du tev ar boultouz. Ranniñ ar boultouz e daou ha lemel an draen kreiz. Troc'hiñ ar boultouz e darnoù tev. Lediñ an darnoù àr ur blakenn-forn, dastrewiñ gant tammoù amann. Lakaat holen ha pebr ha glebiiñ gant dour betek an hanter eus ar plad. Lakaat ar plad er forn da 250° (tt 8-9) ha leuskel da boazhiñ 10 mun. Mirout en ur lec'h tomm.
Aoziñ ar risotto : lemel kentañ delioù glas ar pour. O gwalc'hiñ hag o miñsiñ munut. Diskolpiñ munut ar c'hraksivolez. Digloriñ ar c'hraoñ-kelvez. O c'hraziñ dousik er forn (lakaet àr ‘grilherez'). Lemel o flusk hag o miñsiñ. E-barzh ur gaoter, lakaat an eoul oliv ha lakaat ar pour da c'hweziñ e-pad 10 mun. Oc'hpenniñ ar riz hag en asfritañ e-pad 2 vun, en ur veskiñ. Glebiiñ get ar gwin gwenn hag e lakaat da goazhiñ àr an tan bras. Kenderc'hel da veskiñ. Da c'houde oc'hpenniñ tamm-ha-tamm an dour àr an tan bras. Tamm-ha-tamm e vez euvret an dour get ar riz. Sasuniñ ha laoskiñ da boazhiñ dic'holo en ur veskiñ ingal e-pad 16-20 mun. Bihanaat an tan hag oc'hpenniñ an dienn fresk.
Staliiñ : ranniñ ar risotto e-barzh pladoù don. Lakaat ar c'hig-boultouz war-c'horre ha strewiñ kraoñ-kelvez ha kraksivolez. Douriñ pep asiedad get ur strilhenn eoul kraoñ-kelvez. Servijout doc'htu kar emañ ret debriñ ar risotto an tommañ ar gwellañ.

Menozioù Nathalie : tennit splet eus ar c'hraoñ-kelvez pa vezont fresk ! Lipous int ha mont a reont mat-tre gant ar chokolad, ar per, ar c'haramel hag ivez – met ne vez ket soñjet enni – gant ar pesked (boultouzed, leizenned, merluzed, stivell) ha ar c'hig-yer.

Gwin Arnaud : aliañ a ran deoc'h ur gwin gwenn sec'h gant freskted ha trenkted evit troc'hañ gant c'hwekted ar risotto : ur Muskadig, ur Fief Vendéen de Brem, ur Picpoul de Pinet a zegasay ar freskded iodek hag ar soutilded-mañ.

Ar wastell-deuz get avaloù ha paledoù Breizh

Pierre — 2012-11-20T11:25:57Z

Recette extraite de

aoziñ		30 min
poazhiñ		30 min

live		****
koust		€ € € €

Evit 6 den :

260 g paledoù Breizh (doare "Traou Mad")
1,5 kg avaloù
120 g sukr
70 g amann

Aoziñ ar yod-avaloù : dibluskiñ an avaloù, o displusañ hag o zroc'hañ, stumm un diñs dezhe. Lakaat da boazhiñ àr an tan etre an avaloù, an amann hag ar sukr en ur gastelodenn, dic'holo. Meskiñ gwezh ha gwezh arall ha lazhiñ an tan pa vez teuz-mat an avaloù. Ma vez un tammig dourennek ar flastrenn leuskel da boazhiñ un nebeud munutennoù àr an tan bras ha dic'holo en ur veskiñ ingal.
Echuiñ ar wastell-deuz : mesketat ar paledoù gant ur mesketer-tredan betek kaout ur paladur munut. Raktommiñ ar forn da 180°C (tt 6). A-barzh ur plad d'ober kreien ennañ, skuilhiñ un drederenn ag ar yod-avaloù ha he lediñ mat. He goloiñ get un drederenn a baladur ar paledoù. Gober an dra-mañ div wezh hag echuiñ get paladur ar paledoù. Lakaat ar plad er forn da 180° (tt 6) ha leziñ ar wastell-deuz da boazhiñ e-pad 30 mun betek ma vo gwelet ur seurt kreun alaouret-mat war-c'horre.

Menozioù Nathalie : tennet eo ar rekipe-mañ ag ur rekipe ag Amerika. N'em eus nemet cheñchet ar paladur sukret hag amannet gant paladoù Breizh… ha gwelloc'h eo evit ar rekipe orin !

Gwin Arnaud : ur gwin bervus frouezhek, hanter-sec'h zoken : ur Champagne, ur C'hrémant pe ur blanquette de Limoux. Rannvroeloc'h ha mat-kaer, ur sistr dous, pe gwelloc'h c'hoazh ar Royal Guillevic.

Felpennoù gant pastez Henaff ha mozzarella

Pierre — 2012-11-20T11:13:31Z

Recette extraite de

aoziñ.		10 mun
poazchiñ		5 mun

live		****
koust		€ € € €

Evit un ugent kreunennig bennak :

1 voestad pastez Henaff (156 g)
2 voulenn mozzarella (250 g dizouret)
1 vagetenn-vara e-giz war ar maez

Raktommañ ar forn war an tu ‘grilherez'.
Aoziñ : troc'hiñ ar vagetenn a-ruilhennoù. O c'hraziñ er forn (lakaet àr ‘grilherez') war an daou du. Mirout. Dijelkennañ ar mozzarella hag ar pastez Henaff. Lakaat un tamm mozzarella war an hanter eus ur greunenn hag un tamm pastez Henaff war an hanter all. Ober kement-all evit ar c'hreunennoù arall. Lakaat er forn (lakaet àr ‘grilherez'atav) ha lezel da graziñ ar meskad un tammig bihan-tout (5 mun). Servijiñ doc'htu e-giz digor-kalon.

Menozioù Nathalie : m'emaoc'h o chom e Breizh e c'hellit lakaat fourmaj Tom Timadeuc e lec'h mozzarella. Un tammig saourusoc'h e vo ha magusoc'h ivez. M'ho peus c'hoant da vlasaat an toastoù-mañ evel digor-pred servijit anezho gant ur saladenn c'hlas, evel ur saladenn c'hlas ha tammoù-bara kazet get formaj-gavr tomm.

Gwin Arnaud : ur gwin ruz skañv blaz ar frouezh gantañ : ur Grolleau, ur Gamay, ur Pinot Noir pe ur Pineau d'Aunis en Loire (e gwin gris). Posupl eo mont da gerc'hat ar Pinot Noir e Bro Elzas, pe Gamay e Beaujolais.